|
|
Haldinn í Skála á 2. hæð í Bændahöllinni við Hagatorg í Reykjavík kl. 16:00 þriðjudaginn 13. júní 2006.
Fundinn sátu stjórnarmennirnir: Guðríður Þorsteinsdóttir, Guðmundur Grétar Guðmundsson, Loftur Þorsteinsson, Elmar Hallgríms Hallgrímsson og Örn Bergsson. Starfsmenn: Borghildur Jónsdóttir, Sigrún Þóra Björnsdóttir og Sigurbjörg Björnsdóttir. Aðrir: Daníel Arason og Helga Indriðadóttir frá Glitni, Valgeir Geirsson, Óttar Örn Helgason og Davíð Harðarson frá Landsbanka Íslands, Brynja Hjálmtýsdóttir frá KB-banka og Björg Sigurðardóttir endurskoðandi.
Gestir: Sigurbjartur Pálsson, Sveinn Ingvarsson, Guðmundur Jónsson, Jóhannes Sigfússon og Sigríður Bragadóttir í stjórn Bændasamtaka Íslands, Sigurgeir Þorgeirsson framkvæmdastjóri Bændasamtaka Íslands og Haraldur Benediktsson formaður Bændasamtaka Íslands.
Fundarstjóri var Örn Bergsson og fundarritari Borghildur Jónsdóttir.
Gengið til dagskrár.
| 1. | Skýrsla stjórnar.
Formaður stjórnar, Guðríður Þorsteinsdóttir, flutti skýrslu stjórnar.
Auk venjulegrar árlegrar yfirferðar um hefðbundna starfsemi sjóðsins á liðnu ári greindi formaður frá helstu stærðum varðandi afkomu sjóðsins. Greiðandi sjóðfélagar voru 3.256 á árinu 2005 og fækkaði nokkuð frá fyrra ári. Iðgjöld sjóðfélaga á reikningsárinu námu um 156 mkr. og mótframlög samtals um 260 mkr. Heildariðgjaldatekjur námu um 417 mkr., sem er um 7,5% hækkun frá fyrra ári.
Heildarlífeyrisgreiðslur sjóðsins á árinu námu um 705 mkr. til 3.873 lífeyrisþega og er það um 4,9% hækkun frá árinu 2004. Hluti lífeyrisins er greiddur af ríkissjóði eða 49,8 mkr. Lífeyrisbyrði sjóðsins þyngist með hverju árinu sem líður. Hrein eign sjóðsins til greiðslu lífeyris nam í árslok 18,2 milljörðum kr. og hækkaði um 31,2% frá fyrra ári. Raunveruleg hækkun á eignum sjóðsins nam 12,3% en í árslok barst sjóðnum sérstök innborgun úr ríkissjóði vegna sölu Lánasjóðs landbúnaðarins að fjárhæð 2.630 mkr. Nafnávöxtun án tillits til innborgunarinnar var 14,15% og hrein raunávöxtun 9,61%. Vegna þessarar sérstöku innborgunar og góðrar ávöxtunar á sjóðurinn nú 2.568 mkr. umfram áfallnar skuldbindingar eða 15,9% og 1.001 mkr. eða 4,6% umfram heildarskuldbindingar. Mismunurinn er vegna halla á framtíðarskuldbindingum, sem nú nemur 27.4%.
Um Lífeyrissjóð bænda gilda annars vegar almenn lög um lífeyrissjóði, þ.e.a.s. lög um skyldutryggingu lífeyrisréttinda og starfsemi lífeyrissjóða nr. 129/1997 og hins vegar lög um Lífeyrissjóð bænda nr. 12/1999. Á nýliðnu sumarþingi voru samþykktar breytingar á lögum um Lífeyrissjóð bænda þar sem leitast var við að gera starfsumhverfi sjóðsins sem líkast því sem gildir um aðra lífeyrissjóði. Eftir þessa breytingu eru nú einungis nauðsynleg ákvæði vegna sérstöðu sjóðsins í lögunum, svo sem um sjóðsaðild, iðgjaldsstofn og iðgjald bænda. Gert er ráð fyrir að önnur ákvæði um starfsemi sjóðsins, svo sem um réttindaávinnslu og lífeyrisréttindi, verði í samþykktum sjóðsins eins og tíðkast hjá öðrum lífeyrissjóðum.
Eftir lagabreytinguna nú í sumar getur sjóðurinn tekið upp aldurstengingu réttinda eins og flestir almennu lífeyrissjóðirnir hafa þegar gert. Aldurstengingin er óhjákvæmileg hjá Lífeyrissjóði bænda eins og öðrum sjóðum vegna halla á framtíðarskuldbindingum sem getið var um hér að framan. Undirbúningur breytinga á samþykktum fyrir sjóðinn er nú á lokastigi, en þetta er mjög umfangsmikil aðgerð. Í grófum dráttum virkar hún þannig að ungir sjóðfélagar fá meiri réttindi fyrir iðgjöld sín en eldri sjóðfélagar og byggist það á því að mun lengri tími gefst til að ávaxta iðgjaldið eftir því sem sjóðfélaginn er yngri. Hins vegar verður farin sú leið að greiðandi sjóðfélagar 25 ára og eldri munu halda áfram að greiða í jafna réttindaávinnslu eins og verið hefur upp að ákveðnu hámarki sem nánari reglur verða settar um. Stefnt er að því að breytingar á samþykktum geti tekið gildi um næstu áramót og verður þá nauðsynlegt að boða til aukaársfundar á haustmánuðum til kynningar á þeim.
Hjá sjóðnum störfuðu á árinu að meðaltali 3,7 starfsmenn í fullu starfi og var heildarfjárhæð launa og þóknana rúmlega 20,8 mkr.
Formaður lauk máli sínu með því að ræða brýnustu hagsmunamál sjóðsins en þau eru áfram þau sömu og verið hafa: Að greiðsla mótframlags úr ríkissjóði dugi áfram á móti iðgjöldum allra bænda og hún verði tryggð til frambúðar, að mótframlag hækki, að ávöxtun verði sem best tryggð og að jafnvægi haldist milli eigna og skuldbindinga.
Þá þakkaði hún starfsmönnum lífeyrissjóðsins fyrir mjög gott starf á liðnum árum og sömuleiðis fjárvörsluaðilum og öðrum sem starfað hafa fyrir Lífeyrissjóð bænda á liðnu ári svo og forsvarsmönnum Bændasamtaka Íslands fyrir gott samstarf og óskaði þeim, sjóðfélögum og lífeyrisþegum sjóðsins velfarnaðar í framtíðinni.
|
| 2. | Ársreikningur 2005.
Framkvæmdastjóri, Sigurbjörg Björnsdóttir, kynnti ársreikning.
Í yfirliti um hreina eign til greiðslu lífeyris kemur fram að iðgjaldatekjur námu 417 mkr., sérstakt framlag úr ríkissjóði 2.630 mkr., og lífeyrisgreiðslur 655 mkr. Fjárfestingartekjur námu 2.046 mkr., fjárfestingargjöld 65 mkr. og rekstrarkostnaður 32 mkr. Hækkun á hreinni eign nam 4.341 mkr. og hrein eign til greiðslu lífeyris í árslok nemur 18.236 mkr.
Hrein raunávöxtun á árinu 2005 nam 9,61%, meðaltal hreinnar raunávöxtunar síðustu 5 ára 3,59% og síðustu 10 ára 5,19%. Sundurliðun ávöxtunar á eignasöfnum sjóðsins sýnir að ávöxtun hjá fjárvörsluaðilum var mjög sambærileg.
Loks fór framkvæmdastjóri yfir lánareglur og lánveitingar. Helstu breytingar eru þær að lánstími hefur lengst í allt að 40 ár og hámark lána er nú 6 mkr. Reglur þessar tóku gildi 11. október 2005.
|
| 3. | Tryggingafræðileg úttekt 2005.
Framkvæmdastjóri gerði grein fyrir tryggingafræðilegri úttekt.
Hún fór stuttlega yfir aldursdreifingu greiðandi sjóðfélaga en mjög fáir eru undir 40 ára aldri og ávinna sér hlutfallslega minnstu réttindin.
Heildarlífeyrisskuldbindingar nema 21.202 mkr., áætlaður rekstrar-kostnaður (í 50 ár) 709 mkr. Heildarskuldbindingar nema því samtals 21.911 mkr. Endurmetinn höfuðstóll sjóðsins miðað við 3,5% ávöxtun nemur 18.752 mkr. og verðmæti framtíðariðgjalda 4.160 mkr. Samtals nema endurmetnar eignir 22.912 mkr. Eignir umfram skuldbindingar nema 1.001 mkr. eða 4,57%.
Áfallnar lífeyrisskuldbindingar nema 15.739 mkr., og áætlaður rekstrarkostnaður 445 mkr. Áfallnar skuldbindingar nema alls 16.184 mkr. Eignir umfram áfallnar skuldbindingar nema því 2.568 mkr., eða 15,86% af skuldbindingunum.
Framkvæmdastjóri lauk máli sínu með þökkum til starfsfólks sjóðsins, stjórnarmanna og allra samstarfsaðila sjóðsins fyrir mjög gott samstarf.
|
| 4. | Fjárfestingar 2005
Fulltrúi Glitnis, Helga Indriðadóttir, gerði grein fyrir fjárfestingastefnu, fjárfestingum og þróun markaða. Fjárfestingastefnu sjóðsins var lítillega breytt fyrir árið 2006. Helstu breytingar varða heimildir til fjárfestinga í skuldabréfum svo sem lækkun á lágmarkseign í ríkisskuldabréfum.
Þá fór Helga yfir helstu áhrifaþætti á síðasta ári svo sem mikla hækkun á innlendum hlutabréfamarkaði, en vísitala aðallista hækkaði um 60,9%. Ávöxtunarkrafa íbúðarbréfa sveiflaðist töluvert til á árinu og hækkaði snögglega á haustmánuðum. Þá veiktist krónan um 3,2% gagnvart USD.
Þá fór hún yfir þróun markaða það sem af er þessu ári og nefndi þar helst að miklar sveiflur á mörkuðum hafa einkennt fyrstu mánuði ársins. Hún kvað það ekki gott fyrir íslenska lífeyrissjóði ef harkaleg lending verður í hagkerfinu því þrátt fyrir að það myndi skila sér á jákvæðan hátt inn í erlenda eign sjóðanna hefði það einnig í för með sér eignaverðslækkanir á innlendri eign þeirra. Hún kvað það því öllum í hag ef mjúk lending næðist.
|
| 5. | Kynnt tillaga um breytingu á samþykktum.
Framkvæmdastjóri gerði grein fyrir tillögu að breytingu á grein 12.1.2. í samþykktum fyrir sjóðinn. Hún kvað breytinguna vera gerða með það í huga að gera lífeyrissjóðnum kleift að framkvæma tekjuathugun hjá örorkulífeyrisþegum sjóðsins á sama hátt og í samvinnu við aðra lífeyrissjóði sem eru aðilar að Greiðslustofu lífeyrissjóða, en fram til þessa hefur skort ákvæði í samþykktum lífeyrissjóðanna sem skilgreina hvernig skuli ákvarða viðmiðunartekjur öryrkja, framreikna þær og meta tekjutap þeirra. Mat þetta hefur farið fram hjá lífeyrissjóðunum á mismunandi hátt fram að þessu og því nauðsynlegt að samræma ákvæði um framkvæmdina. Ný grein nr. 12.1.2. sem hljóðar svo:
“Réttur til örorkulífeyris stofnast því aðeins að sjóðfélagi hafi orðið fyrir tekjuskerðingu af völdum orkutapsins. Aldrei skal samanlagður örorkulífeyrir og barnalífeyrir skv. 14. gr. vera hærri en sem nemur þeim tekjumissi sem sjóðfélaginn hefur sannanlega orðið fyrir sökum örorkunnar. Við mat á því hvort tekjuskerðing hafi orðið vegna örorkunnar skal úrskurða sjóðfélaganum viðmiðunartekjur, sem skulu vera meðaltal tekna sjóðfélagans síðustu fjögur almanaksár fyrir orkutapið reiknaðar til úrskurðardags. Heimilt er að miða við meðaltal tekna síðustu þrjú almanaksár fyrir orkutapið vegna sjóðfélaga, er fengið hefur úrskurðaðan örorkulífeyri fyrir 1. janúar 2006. Frá úrskurðardegi skulu viðmiðunartekjurnar taka breytingum í samræmi við breytingar sem verða á vísitölu neysluverðs. Við útreikning tekjumissis skal tekið tillit til atvinnutekna örorkulífeyrisþegans, lífeyris- og bótagreiðslna frá almannatryggingum og öðrum lífeyrissjóðum og kjarasamningsbundinna tryggingabóta sem hann nýtur vegna örorkunnar. Í úrskurði um lífeyri skal jafnframt greina hvaða launatekjur eru lagðar til grundvallar útreikningi, svo sjóðfélaga megi vera ljóst við hvaða mörk lækkun örorkulífeyris vegna tekna er miðað. Örorkulífeyrisþega er skylt að veita sjóðnum upplýsingar um tekjur sínar skv. launaframtali, sé þess óskað. Heimilt er að fresta eða fella niður greiðslur lífeyris, veiti sjóðfélagi ekki umbeðnar upplýsingar.”
Nokkrar umræður urðu um breytinguna en fundarmenn sammála um nauðsyn hennar.
|
| 6. | Önnur mál
Haraldur Benediktsson kvaddi sér hljóðs og þakkaði stjórn og starfsfólki sjóðsins gott samstarf. Hann sagði að kynning sjóðsins á Búnaðarþingi hefði verið mikilvæg og þakkaði Erni Bergssyni stjórnarmanni hjá Lífeyrissjóði bænda fyrir hana og kvað skilning fara batnandi. Hann sagði sjóðinn vera kominn í betri stöðu og þakkaði það sölu Lánasjóðs landbúnaðarins sem breytti töluverðu. Hann áréttaði mikilvægi þess að tryggja framtíð mótframlags. Hann kvað ekki vera mikla óvissu varðandi það en miður að ekki væri til samningur þar um. Hann sagði þetta vera bagalegt, en að búið væri að fara fram á viðræður og kvaðst eiga vona á niðurstöðu með haustinu. Þá nefndi hann það að grænar greiðslur mótframlags féllu vel að markmiðum ríkisstjórnarinnar. Efst var honum í huga að staða sjóðsins væri önnur og betri en var, ástæða til að halda því til haga og vera opinn fyrir þeim möguleikum sem kynnu að bjóðast til að efla sjóðinn og bæta.
Ekki tóku fleiri til máls og lagði fundarstjóri til að hann og fundarritari gengju frá fundargerð og var það samþykkt.
Fundi slitið kl. 17:10
|
|
|
|